DAPHNIS et ALCIMADURE

Un opera en occitan a la cort deu rei Louis XV

☰

Lo 29 de noveme 1754 a Fontainebleau que s’i jòga, peu prumèr còp e davant la cort deu Rei de França, l’opèra deu compositor Jean-Joseph Cassanéa de Mondonville, Daphnis et Alcimadure. Originari de Narbona, vriulonaire virtuós, mèste de musica a la Capèra Reiau, Mondonville, conegut peus sons oratòrios e la soa defensa de l’estille francés dens la Querelle des Bouffons, que presenta ua pèça qui suspren la critica e qui estona lo public.

En efèit, lo liberet de Daphnis et Alcimadure qu’ei escriut tot en occitan, a l’excepcion deu son prològue, e qu’intro- duseish aires populars cantats per las campanhas com Roussignoulet dou bosc, roussignoulet salbatge. Despuish l’incursion de Jean-Joseph Mouret en ua entrada de las soas Fêtes de Thalie la lenga d’Òc n’avèva pas mei conegut ua tau exposicion nacionau e internacionau.

Après estar demorat desbrombat batlèu dus sègles de seguida, l’opèra qu’estó recreada a Montpelhièr en julhet 1981 abans de conéisher ua eclipsi navèra, dinc au moment qui l’orquèstra Les Passions, miat per Jean-Marc Andrieu, se n’apoderè dens la perspectiva d’ua recreacion navèra.

Dab la mustra Daphnis et Alcimadure, lo CIRDÒC - Institut occitan de cultura que desira portar a la coneishença deus publics ua illustracion de las mei vivas de la creativitat de mila ans de cultura occitana.