DAPHNIS et ALCIMADURE

Un opéra en occitan a la cort del rei Louis XV

☰

Lo 29 de novembre de 1754 a Fontainebleau es jogat, pel primièr còp e davant la cort del Rei de França, l’opèra del compositor Jean-Joseph Cassanéa de Mondonville, Daphnis et Alcimadure. Originari de Narbona, violonista virtuós, mèstre de musica a la Capèla Reiala, Mondonville, conegut per sos oratòrios e sa defensa de l’estíl francés dins la Querelle des Bouffons, presenta una pèça que suspren la critica e estona lo public.

De fait, lo libret de Daphnis et Alcimadure es escrit tot en occitan, fòra son prològ, e introdusís d’aires populars cantats pel campèstre coma Roussignoulet dou bosc, roussignoulet salbatge. Dempuèi l’incursion de Jean-Joseph Mouret dins una entrada de sas Fêtes de Thalie en 1722, la lenga d’Òc aviá pas mai coneguda tala exposicion nacionala e internacionala.

Après èsser tombat al deslembrièr per prèp de dos sègles, l’opèra foguèt recreat a Montpelhièr en julhet de 1981 abans de conéisser una eclipsa novèla, fins que l’orquèstra Les Passions, jos la direccion de Jean-Marc Andrieu, se n’empare dins l’amira d’una recreacion novèla.

Amb l’exposicion Dafnís e Alcimadura lo CIRDÒC - Institut occitan de cultura desira portar a la coneissença dels publics una illustracion de las mai vivas de la creativitat de mila ans de cultura occitana.