Belaud de la Belaudiera

O trop heuroux l'home que de sa vido
N'a de prezon jamais agut sentido,
N'auzit lou brut d'un gros manon de claux,
Ny lou DON-DON, dau pallais la campano,
Que tremoular d'uno febre cartano,
Fa tout subit la gent à tout prepaus.

Beat qui n'ausis lou son espouventable
D'aqueou DON-DON, messagier veritable
De pou, d'esfray, de plours, de brans, d'helas !
Que sie daunat qui fét tallo campano :
Jamays per ben son matail non s'affano :
„Qu'aqueou DON-DON n'en fa de desoulas.

Non s'es troubat de gaffes uno trouppo,
Creissent prés sy coumo pan blanc en souppo,
Que l'ajoun prés soutto lou trabuchet,
Que l'ajoun més à la desesperado
Dins la prezon vont' s'escriou la journado,
L'an, et lou mez, que passo lou guichet.

Ò tròp eurós l’òme que de sa vida
N’a de preson jamai agut sentida,
N’ausit lo brut d’un gròs manon de claus,
Ni lo DON-DON, dau palais la campana,
Que tremolar d’una fèbre cartana,
Fa tot subit la gent a tot prepaus.

Beat qui n’ausís lo son espoventable
D’aqueu DON-DON, messagier veritable
De páur, d’esfrai, de plors, de brams, d’ailàs !
Que siá damnat qui fèt tala campana :
Jamai per ben son matalh non s’afana :
Qu’aqueu DON-DON ne’n fa de desolats.

Non s’es trobat de gafes una tropa,
Creissent pres si coma pan blanc en sopa,
Que l’ajan pres sota lo trabuchet,
Que l’ajan mes a la desesperada
Dins la preson vont’ s’escriu la jornada,
L’an, e lo mes, que passa lo guichet.

Encin s'uzet lou bendeou de Justicy,
Et de vezer ello prenguet lou vicy,
Voulent saber so que vallon escus,
Lous estremar souto uno clavaduro,
A cent per cent lous dounar à l'usuro,
Et aumentar lou rolle das abus.

De son couteou que rés non respetavo,
Et que lous grandz coumo pichots taillavo,
Lou trop longs tens l'a fach venir rouilloux,
Sau respetar Madamo la ferrillo,
Et s'affanar desubre la Paurillo,
Gibetz non son que per lous pevouillous.

 May vonte son sey ballanssos anados ?
M'es istat dich qu'ellos fouron pourtados
En Callicuc, pezar de singes vertz,
Ou d'anedons (bridas coum'uno mullo)
„Despuis que fon dau drech perdut la bullo,
„Tout és anat de biaiz et de travers.

Ensin s’usèt lo bendèu de Justici,
E de véser ela prenguèt lo vici,
Volent saber çò que valon escuts,
Los estremar sota una clavadura,
A cent per cent los donar a l’usura,
E augmentar lo ròtle dels abús.

De son cotèu que res non respectava,
E que los grands coma pichòts talhava,
Lo tròp long temps l’a fach venir rolhós,
Saup respectar Madama la ferilha,
E s’afanar desubre la Paurilha,
Gibets non son que per los pevolhós.

Mai vonte son sei balanças anadas ?
M’es estat dich qu’elas foron portadas
En Calicuc, pesar de signes verds,
Ou d’anedons, bridats coma una mula,
Despuèi que fon dau drech perdut la bula,
Tot es anat de biais e de travers.

Que non son las paretz d’eyci toutos de ciero,
De burre ou ben de sau ? guaire non s’estariou,
Car tant de mous dous hueils de plours you gitariou
Que la sau sy fondrie dedins tallo ribiero.
	Et puis de mous souspirs la feroujo tubiero,
Per lou fuoc que Margot tisouno dedins you,
Lou burre vistament et la ciero fondriou,
En rendent la preson plato coumo nostro hiero.
	Per passar lou debouort que mous hueils aurien fach,
Dau poustan de mon liech qu’à present ay desfach,
Embé forço claveoux fariou uno barquetto.
	Puis las flechos qu’amour dins mon couor a leissat,
Per ramos servirien d’un et d’autre coustat,
Per au pouort de salut sauvar ma persouneto.

Que non son las parets d’aicí totas de ciera, 
De burre o ben de sau ? gaire non s’estariáu,
Car tant de mos dos uelhs de plors ieu getariáu
Que la sau si fondriá dedins tala ribiera. 
	E puis de mos sospirs la ferotja tubiera,
Per lo fuòc que Margot tisona dedins ieu, 
Lo burre vistament e la ciera fondriáu,
En rendent la preson plata coma nòstra iera.
	Per passar lo desbòrd que mos uelhs aurián fach, 
Dau postam de mon liech qu’a present ai desfach,
Ambé fòrça claveus fariáu una barqueta.
	Puis las flechas qu’amor dins mon còr a laissat, 
Per ramas servirián d’un e d’autre costat,
Per au pòrt de salut sauvar ma personeta.

He Diou, quand my veiray soult’aquello ramado
Que Mousur de Moullans fet faire l’autre estiou,
Per à sa compagnie espeillar lou couniou,
Ou l’anco de cabrit, ou la perdrix lardado ?
    Puis venent lou goustar, uno fresco sallado,
Au vinaigro rousat, dau millour dau barriou,
My semblo que sarie un passatens de Diou,
Non-pas patir eicy à la desesperado.

Eh Diu, quand mi veirai sot’aquela ramada
Que Monsur de Molans fèt faire l’autre estiu,
Per a sa companhia espelhar lo coniu,
O l’anca de cabrit, o la perdritz lardada ?
	Puis venent lo gostar, una fresca salada,
Au vinaigre rosat, dau melhor dau barriu,
Mi sembla que seriá un passatemps de Diu,
Non pas patir aicí a la desesperada.

You mouory de regret, pensant à la partensso,
Que fayre siou constrench au terren Franchiman :
Car senty que mous hueils eilla mourran de fan,
Luench de mon beou Souleou qu’esclaro la Prouvensso.
	Et comben que faray uno grand diligensso
Per tournar revezer l’hueil murtrier et human,
D’aquello que my ten esclau souto sa man,
Ay pou que mourray leou privat de son absensso.
	Tous plezers Carmentrans n’auran per my valour,
Et non regretaray, ny danssos, ny tambour,
Masquos, ny masquillons, ny tymbous, ny tymballos.
	Soulament de ton hueil lou regret my sara,
	Que dedins mon cerveou, mais de brut eou fara,
Qu’au Mez ensafranat, un troupeou de Sigallos.

Ieu mòri de regret, pensant a la partença,
Que faire siáu constrench au terren Franchimand :
Car senti que mos uelhs ailà moràn de fam,
Luenh de mon bèu Soleu qu’esclara la Provença.
	E comben que farai una grand diligença
Per tornar revéser l’uelh murtrier e uman,
D’aquela que mi ten esclau sota sa man,
Ai páur que morai lèu privat de son absença.
	Tos plesers Carmentrant n’auràn per mi valor,
E non regretarai, ni danças, ni tamborn,
Mascas, ni masquilhons, ni timbós, ni timbalas.
	Solament de ton uelh lo regret mi sarà,
Que dedins mon cervèu, mai de brut èu farà,
Qu’au Mes ensafranat un tropèu de Cigalas.

Es à Zaix que tout va aros per escudello,
En aquest jourt sagrat de la festo de Diou
N'y a Turc, ny Sarazin, ny Mourou, ny Judiou,
Vesent la proucession, virarié bandinello.
	L'houstau lou plus pauret a lardat de canello
Lou jambon, et implit de bon vin lou barriou,
Car esperant lou juoc d'Abraham et de son fiou
Es question de mouchar à la guiso nouvello.
	Apres aver paissut et hujat l’emboutaire,
Tous au prat bataillier van cent cambados faire,
Danssant monssen Reimon, ou brandous bajareous.
	Et puis au retournar cascun pren sa mestresso
Per dessouto lou bras, et farcis d’allegresso,
Sy van becquenejan coumo dous pigeouneous.

Es a Ais que tot va aras per escudela,
En aquest jorn sagrat de la fèsta de Diu
N’i a Turc, ni Sarrasin, ni Mòro, ni Judiu,
Vesent la procession, virariá bandinela.
	L’ostau lo plus pauret a lardat de canela
Lo jambon, e emplit de bon vin lo barriu,
Car esperant lo juòc d’Abraham e de son fiu
Es question de mochar a la guisa novèla.
	Après aver paissut e ujat l’embotaire,
Tots au prat batalhier van cent cambadas faire,
Dançant monsen Raimond, o brandos bajarèus.
	E puis au retornar cascun pren sa mestressa
Per dessota lo bras, e farcits d’alegressa,
Si van bequejant coma dos pijonèus.